Brasil: Forsetin góðtekur ikki valúrslitið

Fráfarandi brasilski forsetin, Jair Bolsonaro, krevur nú, at allar talgildar atkvøður á forsetavalinum herfyri, verða strikaðar. Tað skrivar AP.

Hann hevur samstundis latið eina klagu til valmyndugleikarnar í landinum, við kravi um, at allar atkvøðurnar verða taldar av nýggjum.

Bolsonaro tapti í oktober á forsetavalinum fyri Luiz Ignacio Lula da Silva, og myndugleikarnir hava longu góðkent úrslitið av valinum.

Bolsonaro sigur í kæruni, at serfrøðingar hava víst á eitt teldubrek, men teir søgdu samstundis, at brekið onga ávirkan hevði á sjálvt valúrslitið.

Sambært advokatinum hjá Bolsonaro, fer hann at fáa 51 prosent av atkvøðunum, um kæran verður gingin á møti. Men sannlíkt er ikki, at fráfarni forsetin fær sín vilja, skrivar Ritzau.

Lula da Silva

Luiz Ignacio Lula da Silva vann forsetavalið í Brasil, og myndugleikarnir hava longu góðkent úrslitið av valinum. (Mynd: Ritzau Scanpix)