Vil hava málið um revsing tikið uppaftur

Nú Kappingarráðið eisini fekk viðhald í Landsrættinum um loðsflutningin í Fuglafirði, fer Kappingareftirlitið at heita á fútan um at taka málið um revsing uppaftur.

Kappingareftirlitið meldaði á sinni málið til løgregluna, men tað hevur bíðað eftir dóminum úr Landsrættinum. 

Eystari landsrættur staðfesti í gjár avgerðina hjá Kappingarráðnum í 2018 um, at Fuglafjarðar kommuna breyt kappingarlógina, tí kommunan forðaði einum felag at veita loðsflutning.

Fuglafjarðar kommuna er eisini dømd at rinda sakarmálskostnaðin hjá Kappingarráðnum, 60.000 kr., uttan meirvirðisgjald í Føroya rætti, og 40.000 kr. við meirvirðisgjaldi í Landsrættinum.

Fuglafjarðar kommuna fer nú at viðgera dómin hjá Landsrættinum og hvussu loðsflutningurin skal skipast í framtíðini.