Auditorium í gamla svimjihylinum í Vági

Gamli svimjihylurin í Vágs skúla skal nú umbyggjast, so hann í framtíðini verður auditorium.

Vágs kommuna hevur í fyrsta umfarið sett 700.000 krónur av til endamálið í fíggjarætlanini fyri næsta ár.

Verandi skúlaaula er frá 1979, tá ið skúlin var gjørdur, men hon er vorðin alt ov lítil, tí har eru bara 60 sitipláss. Í skúlanum ganga 230 børn, og har eru umleið 30 lærarar.

Næmingatalið stendur í vøkstri, og við skúlaársbyrjan í 2024 fer skúlin at hava brúk fyri fleiri skúlastovum, nú tað verða fleiri tvísporaðir flokkar.

Vágs kommuna sigur á heimasíðu síni, at gerast skal ein langtíðarætlan fyri skúlan og dagføringar, ið neyðugt verður at gera næstu árini.