25 yvirgangsfólk tikin í Týsklandi

Løgreglan í Týsklandi hevur í morgun handtikið minst 25 fólk í einum stórum átaki.

Tey handtiknu eru víðgongd og eru undir illgruna fyri at hava samband við ein yvirgangsbólk.

Tað upplýsir ákærumyndugleikin í Berlin, sambært tíðindastovuni Ritzau.

- Tey handtiknu eru partur av einum yvirgangsbólki, sum legði ætlanir um at kollrenna týska statin og seta sínar egnu skipanir í verk, sigur ákærumyndugleikin.

Meira enn 3.000 løgreglufólk vóru við í átakinum tíðliga í morgun.

Týsk løgregla, løgregluátak í Týsklandi

Hús og íbúðir rannsakað

Húsarannsóknir vórðu gjørdar í meira enn 130 húsum og íbúðum í 11 týskum landspørtum. Rannsóknir vóru eisini gjørdar í Eysturríki og Italia.

Millum tey handtiknu eru fólk frá sonevndu Reichsbürger-rørsluni, sum miðlar víðgongd sjónarmið og jødahatur.

Reichsbürger verður sett í samband við fleiri nastiskar fylkingar. 

Fregnartænastan í Týsklandi heldur, at umleið 21.000 fólk stuðla rørsluni.

Sambært týska blaðnum Bild høvdu fleiri fólk í rørsluni vápn, og tað ljóðar, at fleiri teirra vóru von við at brúka vápnini.

Ritzau skrivar, at rørslan hevur lagt ætlanir um kvettroyndina síðani november 2021.