Hava útflutt fyri góðar tíggju milliardir í ár

Føroyingar hava útflutt fyri meira enn tíggju milliardir krónur fyrstu tíggju mánaðirnar í ár. 

Nýggjastu hagtølini hjá Hagstovuni fyri útflutning staðfesta, at útflutningurin til 1. november var 10,2 milliardir krónur. 

Somu mánaðir í fjør var útflutningurin 7,9 milliardir krónur. Vøksturin er 29 prosent.  

Nýtt met

Og longu nú kann staðfestast, at útflutningsvirðið av fiskavørum í ár enn størri enn í fjør, sum annars var metár. Higartil í ár eru fiskavørur útfluttar fyri 9,3 milliardir, sum eru tvær milliardir krónur meira enn sama tíðarskeið í fjør. 

Laksaútflutningurin vaks úr 3,5 milliardum krónum, upp í 4,5 milliardir krónur. Vøksturin er 30 prosent.

Vøksturin í útflutninginum stavar tó fyrst og fremst frá prísvøkstri, tí útflutningsnøgdin hetta tíðarskeiðið er minkað. 

Tilsamans vóru útflutt 406.000 tons av fiskavørum fyrstu tíggju mánaðirnar í ár. Tað eru fýra prosent minni enn somu tíð í fjør.