Suðuroyartunnilin er hjá løgmanni

Tað vakti ans, tá Dennis Holm, ikki meira enn komin í landsstýrið, boðaði frá, at tá hetta valskeiðið er komið í helvt, verður byrjað at bora Suðuroyartunnilin.

Gamaní umsitur Dennis Holm samferðsluna í nýggja landsstýrinum.

Men hann umsitur ikki heimildir landsstýrisins mótvegis partafelagnum Suðuroyartunlinum.

Tað ger løgmaður.

Løgmaður hevur heimildir landsstýrisins mótvegis 10 partafeløgum og vinnurekandi grunnum, sum landið eigur pengar í. Teirra millum eru feløgini hjá undirsjóvartunlunum.

Dennis Holm hevur tó samgonguskjalið at hava sítt lyfti í.

Har stendur, at heimild  verður givin partafelagnum Suðuroyartunlinum at gera allar neyðugar  kanningar í sambandi við Suðuroyartunnilin, og neyðugur peningur  verður játtaður.

Miðað verður eftir,  at kanningarnar eru lidnar við ársenda í 2024.    

Samstundis verður ein haldføriskanning gjørd, og ein fíggingarleistur verður funnin sum skjótast.