Óvanliga nógv drápsmál í Grønlandi

Óvanliga nógv mál, sum kunnu enda við at verða skrásett sum dráp, hava verið í Grønlandi í ár.

Løgregluovastin Bjørn Tegner Bay sigur við Sermitsiaq, at løgreglan í løtuni hevur átta mál frá í ár, sum verða kannað sum drápsmál. Í síðsta enda er tað upp til rættin at avgera, um talan er um dráp.

Sambært hagtølunum hjá grønlendsku løgregluni, hava verið millum trý og seks drápsmál árliga síðani 2017.

- Nógvu drápsmálini leggja trýst á løgregluna, tí vit mugu raðfesta tey framum annað, sum so kemur at liggja á láni, sigur Bjørn Tegner Bay við grønlendska blaðið.