Færri gistingar í heyst

Heystið var lakari hjá gistingarhúsunum enn árið fyri, vísa tøl hjá Hagstovuni.

Í november 2022 vóru góðar 8.000 gistinætur á føroysku gistingarhúsunum. Tað er ein fjórðingur minni enn sama mánað í 2021.

Gistinæturnar vóru stívliga 2.300 færri í november 2022 samanborið við sama mánað í 2021. 

Færri gistu eisini í september og oktober enn somu mánaðir í 2021. Heystið hevur tí verið nakað lakari hjá gistingarhúsunum í 2022 enn í 2021.

28 prosent óbrúkt

Gistinætur telja, hvussu nógvir og hvussu leingi persónar gista á gistingarhúsum.

Tølini vísa eisini hvussu stórur partur av tøku kømrunum verður brúktur. 28 prosent av kømrunum vóru brúkt í november. Tað er væl minni enn í november í 2021. Tá vóru 35 prosent av kømrunum brúkt.

Verður hugt at samlaðu tølunum fyri januar, til og við november í 2022, sæst, at gistingarnar og innskrivingarnar eru um góð 30 prosent fleiri enn sama tíðarskeið í 2021, hóast september, oktober og november hava verði lakari enn í 2021.