Oljugrunnurin misti 1637 milliardir í fjør

Norski oljugrunnurin hevði 1.637 milliardir norskar kr. í tapi í fjør. Tað er størsta hallið í søguni hjá Oljugrunninum, skrivar DR.

Upphæddin svarar til umleið 1.100 milliardir danskar kr.

- Marknaðurin var ávirkaður av krígnum í Evropa, stórari inflatión og hækkandi rentum. Tað hevur havt keðiliga ávirkan á bæði partabræva- og lánsbrævamarknaðin samstundis, sum er óvanligt, sigur stjórin í grunninum, Nicolai Tangen, sambært Reuters.

Áðrenn metvánaliga úrslitið í fjør, var vánaligasta úrslitið hjá Norska Oljugrunninum í 2008, tá tapið var 633 milliardir norskar kr.

Norski oljugrunnurin var settur á stovn í 1996, og er síðani vaksin nógv. Hann er í dag millum størstu almennu pengatangar í øllum heiminum.

Grunnurin eigur partabrøv í 9.300 feløgum kring heimin.