Stytt arbeiðsvika fer at avmarka møguleikarnar fyri lønarhækkingum

Um arbeiðsgevarar fáa ein fíggjarligan smeit av, at arbeiðsvikan verður stytt við lóg, so fer tað at ávirka lønarsamráðingarnar á arbeiðsmarknaðinum.

Tað sigur sigur Niels Winther, stjóri í Føroya Arbeiðsgevarafelagi.

Ingilín Strøm, landsstýriskvinna í arbeiðsmarknaðarmálum, ætlar sær í tingið við lógaruppskoti um styttri arbeiðsviku, áðrenn løgtingið fer í summarfrí. 

Ingilín D. Strøm, landsstýriskvinna við umhvørvismálum, 16:9

Stendur í samgonguskjalinum

Í samgonguskjalinum stendur um ætlanina at stytta arbeiðsvikuna:

"Arbeiðsvikan verður stytt niður í 37 tímar. Trípartasamráðingar verða tiknar upp um at stytta arbeiðsvikuna við einum tíma annaðhvørt ár, til hon er komin niður á 37 tímar. Arbeiðsvikan verður skipað við lóg."

Landsstýriskvinnan í arbeiðsmarknaðarmálum ætlar sær at hava hesar trípartasamráðingar við partarnar á arbeiðsmarknaðinum, áðrenn hon fer í løgtingið við uppskotinum. 

Føroya Arbeiðsgevarafelag vil fegið við til hesar samráðingarnar, sigur Niels Winther, stjóri. 

Niels Winther, Vinnuhúsið

Rakar ymiskt

Tað er tó ymiskt, hvussu eitt uppskot um at stytta arbeiðsvikuna fer at ávirka limirnar hjá Føroya Arbeiðsgevarafelag.

"Um tað endar við, at okkara limir fáa álagt eyka gjald av einari styttari arbeiðsviku, so fer tað at ávirka møguleikarnar fyri eitt nú lønarhækkingum í komandi sáttmálasamráðingum," ávarar Niels Winther, stjóri í Føroya Arbeiðsgevarafelag. 

Stjórin í Føroya Arbeiðsgevarafelag heldur ikki, at tað eigur at vera neyðugt at lóggeva fyri at stytta um arbeiðsvikuna. Tað eiga partarnir á arbeiðsmarknaðinum at finna út av sjálvir, heldur Niels Winther.