Fiskaútflutningurin í Grønlandi vaks 74 mió. kr.

Útflutningsvirðið av sjófeingi í Grønlandi gjørdi eitt stórt lop í januar.

Í januar í ár var virðið 273 milliónir krónur, og tað eru 74 milliónir krónur meira enn útflutningurin í januar í 2022. Vøksturin er 37,1 prosent.

Grønlendska hagstovan upplýsir, at tað serliga eru prísirnir á rækjum, toski og svartkalva, sum eru hækkaðir nógv seinasta árið.

Rækjuútflutningurin minkaður

Útflutningurin av rækjum minkaði í nøgd við 16,9 prosentum, men samlað var talan um eina virðisøking, tí prísirnir hækkaðu 27,2 prosent.

Útflutningurin av toski vaks 18,9 prosent í nøgd og heili 52,9 prosent í virði.

Samanborið við januar 2021 og januar í ár vaks útflutningsvirði av svartkalva 152,5 prosent. Nøgdirnar vuksu 125 prosent og kiloprísurin 12,2 prosent.