Akrar verður neyvan broytt í hesum umfari

Tað verður neyvan í hesum umfarinum, at bygdarnavnið Akrar verður broytt til Agrar, altso at g kemur í staðin fyri k.

Sumbiar kommuna fekk tilmæli frá Staðarnavnanevndini um tað.

Men bygdaráðið hevur ikki viðgjørt málið. 

Borgarstjórin, Eyðbjørn Thomsen, sigur, at málið er slept í hesum umfarinum.

Málið er ikki nýtt, tí tað var eisini frammi fyri nøkrum árum síðani. Og tá feldi bygdaráðið tilmælið.

Eingin akur

Staðarnavnanevndin sigur, at eingin akur er í navninum Akrar.

Navnið kemur av orðinum øgr - við g - sum merkir lítil vík.

Á Økrum eru Víkin og Rekavík, sum kunnu vera grundarlagið undir bygdarnavninum. 

Á suðuroyarmáli er annars samanfall millum Agrar og akrar, og tað kann hava stuðlað upp undir umtulkingina av merkingini á navninum, so tað hevur verið sett í samband við akur. 

Kunnu kærast

Sambært reglugerðini um Staðarnavnanevndina hevur hon heimild at taka avgerðir í staðarnavnaspurningum. 

Avgerðir hjá Staðarnavnanevndini kunnu kærast til landsstýrisfólkið í mentamálum. 

Reglugerðin sigur eisini, at Staðarnavnanevndin hevur skyldu til at hoyra avvarðandi kommunur og myndugleikar í sambandi við áseting av formi og stavseting av staðarnøvnum.