Arbeiðs- og brunaeftirlitið skal hava virknan leiklut í tilbúgvingini

Ætlanin er, at Arbeiðs- og brunaeftirlitið skal hava ein meira virknan lut í at tryggja, at tilbúgvingarætlanirnar hjá føroysku økisábyrgdarmyndugleikunum gerast nógv meira samskipaðar enn tær eru nú.

Landsmyndugleikarnir hava í løtuni ikki eitt samlað yvirlit um tænastur, hjálparátøk, útgerð og annað, sum eiga at vera tøk til at brúka í ávíst tíðarskeið, um kreppustøða kemur.

Her verður hugsað um neyðsynjarvørur sum mat, heilivág og olju.

Slíkt yvirlit eigur at vera partur av tilbúgvingarætlanunum hjá økisábyrgdarmyndugleikunum, um so er, at myndugleikarnir meta, at tørvur er á slíkum yvirliti. 

Tað sigur Aksel V. Johannesen, løgmaður, í svari til Johan Dahl, løgtingsmann, sum spurdi um tilbúgvingina í Føroyum.

Aksel V. Johannesen, løgmaður, 16:9

Aksel V. Johannesen, løgmaður, hevur svaraði Johan Dahl. (Mynd: Bjarni Árting Rubeksen)

Møgulig álop á nettrygd

Løgmaður sigur, at Føroyar hava tilbúgvingarskipan og -samskipan, sum skal tryggja, at virkisførið í samfelagnum minst møguligt verður skert ella fer til grundar, tá skaðar ella vanlukkur raka Føroyar.

Støðan í Ukraina kann hava við sær møgulig álop á nettrygdina, cybertrygdina, í Føroyum og  møguligar avbjóðingar við vøru -og tænastuveitingum, til dømis nøktandi orkuveiting, stendur í svarinum.

Undanfarna landsstýri heitti á Kreppuráðið um at gera eina meting um, hvørjar avleiðingar, kríggið í Ukreina kann fáa fyri Føoyar.

Hugt var nærri at økjum sum flóttafólk, netverjutrygd, veitingartrygd og tilbúgving. 

Hesar metingar gjørdu, at arbeitt verður við at tillaga føroysku tilbúgvingina á ymiskum økjum.

Fyrstu stigini eru tikin til, at Føroyar gerst limur í Haga-samstarvinum, sum er samstarvið  millum Norðurlond um tilbúgving.  

Johan Dahl

Johan Dahl, løgtingsmaður, spurdi løgman um tilbúgvingina. (Mynd: Bjarni Árting Rubeksen)