Lýsa nú eftir diakonpresti og studentapresti

Um fáar vikur verður fyri fyrstu ferð í Føroyum lýst eftir diakonpresti og studentapresti.

Landsstýriskvinnan hevur góðkent, at fólkakirkjan nú skipar hesi bæði nýggju embætini í fólkakirkjuni og verða størvini vónandi sett í summar.

Stuðulin frá landinum til prestastørv er hækkaður. 

Sirið Stenberg, landsstýriskvinna, og Jógvan Fríðriksson, biskupur, hittust í gjár.

TAKS og meirvirðisgjald

Tey tosaðu millum annað um, at TAKS hevur broytt umsitingina av skipanini við at bera aftur meirvirðisgjaldið av byggiverkætlanum til ikki vinnulig, almannagagnlig endamál soleiðis, at kirkjur ikki longur fáa lut í skipanini. 

Sirið Stenberg sigur, at landsstýrið hevur heitt á Fíggjarmálaráðið um at taka málið upp.

Landsstýriskvinnan kunnaði eisini biskup um, at hon hevur sett ferð á arbeiðið at gera eina lítla lógarbroyting, so til ber at býta mongu uppgávurnar hjá dómprósti millum tveir próstar, soleiðis sum biskupur hevur mælt til.