Eitt valevni aftrat til sessin sum forfólk í SNP

Kate Forbes, skotski fíggjarmálaráðharrin, boðar nú frá, at hon stillar eisini upp sum forfólk í skotska tjóðskaparflokkinum, SNP. Tað skrivar BBC.

Forkvinnan, Nicola Sturgeon, sum er tann, ið hevur sitið longst sum fyrstiráðharri í Skotlandi, boðaði heldur óvæntað í farnu viku frá, at hon leggur frá sær.

Heilsumálaráðharrin, Humza Yousaf, var skjótur at siga, at hann stillar upp sumforfólk í flokkinum. Nú fær hann so kapping frá Kate Forbes.

Nýtt forfólk skal veljast næstu seks vikurnar við atkvøðugreiðslu fyri flokslimirnar. Úrslitið er greitt 27. mars.