Framvegis lítið arbeiðsloysi

Arbeiðsloysið var 0,8 prosent í januar.

Tað svarar til 249 fulltíðararbeiðsleys. 

Arbeiðsloysið var til samanberingar eitt prosent í januar í 2022. Tað svaraði til 288 fulltíðararbeiðsleys, skrivar Hagstovan.

Arbeiðsloysið var annars 0,7 prosent í meira enn hálvt ár. Tað fór niður í 0,7 prosent í juni í fjør, og var 0,7 prosent líka til desember.

Arbeiðloysið í januar var 0,8 prosent bæði hjá monnum og kvinnum.

34 langtíðararbeiðsleys

Arbeiðsloysið er minst hjá teimum, sum eru millum 45 til 54 ár.

Tað er størst hjá teimum, sum eru millum 25 og 34 ár.

34 fólk eru langtíðararbeiðsleys. Tey hava einki arbeiði havt í meira enn eitt ár.

Sambært allýsing eru tey arbeiðsleys, sum ikki hava nakað arbeiði, eru fult tøk á arbeiðsmarknaðinum og eru virkin arbeiðssøkjandi.

Í mánaðarligu arbeiðsloysisuppgerðini hjá Hagstovuni eru tey, sum eru skrásett hjá ALS og Almannaverkinum, og koma undir allýsingina.

183 fáa stuðul í dag

Á heimasíðuni hjá ALS standa 183 fólk at fáa arbeiðsloysisstuðul í dag.

370 fólk fáa fiskavirkisstuðul.

Á heimasíðuni hjá ALS eru eisini 107 starvslýsingar.