Bygnaðarbroytingarnar á Glasi eru komnar í gildi

Ætlaðu bygnaðarbroytingarnar á Glasi eru settar í verk í morgun.

Una Joensen, rektari, kunnaði starvsfólkini um broytingarnar í skrivi í gjár. 

Broytingarnar hava í høvuðsheitum við sær, at leiklutirnir hjá rektaranum, stjórunum á gymnasialum miðnámi, yrkisrættaðum miðnámi og leiðaranum fyri næmingatænastuni verða broyttir. 

Una Joensen

Una Joensen er rektari á Glasi.

Rektarin størri ábyrgd

Við broytingini hevur rektarin sjálv ábyrgdina av gymnasialum miðnámi og høvuðsábyrgd av skúlanum, og so er ætlanin, at útbúgvingarstjórin fyri yrkisnám skal vera vararektari, og starvsheitið skal broytast samsvarandi. 

Starvið sum útbúgvingarstjóri í gymnasialum miðnámi verður niðurlagt, og verandi útbúgvingarstjóri hevur í tí sambandi fingið ætlanarskriv um uppsøgn.

Harumframt verður næmingatænastan skipað við einum stjóra. 

Yrkisfelagið mótmælir

Yrkisfelagið Miðnám hevur mótmælt ætlaðu bygnaðarbroytingini, tí felagið metir, at rektarin ikki leggur upp fyri galdandi sáttmála hjá felagnum, og at fleiri mannagongdir í sambandi við at seta og siga upp starvsfólk eru ikki fylgdar. 

Í skrivinum til starvsfólkini staðfestir rektarin, at nógvar viðmerkingar eru komnar frá starvsfólkum og fakfeløgum, men hon heldur fast um bygnaðarbroytingarnar.

Rektarin metir, at nýggi bygnaðurin er rætti bygnaðurin til virksemið, sum er á Glasi nú, og broytingarnar vera øllum at frama.