Reglurnar um brúksskyldu á veiðiloyvi verða tillagaðar

Í vár verða tillagingar gjørdar í reglunum, sum áseta brúkstreyt fyri at avhenda veiðirættindi, og í reglunum um brúksskylduna á veiðiloyvi og fiskiloyvi. 

Tað stendur at lesa í frágreiðingini um sjófeingi, sum Dennis Holm, landsstýrismaður í fiskivinnumálum, legði fyri løgtingið í dag.

Hetta skal gerast, so reglurnar endurspegla dagsins tørv, og eru neyvari og greiðari fyri loyvishavarar og umsiting, verður sagt.

Munandi og rímiligur partur

Búskaparlig burðardygd fevnir millum um, at eigarin, Føroya fólk, fær ein “munandi og rímiligan part” av tilfeingisrentuni, og er tí ein dagføring av tilfeingisgjøldunum sett á skránna í Fíggjarmálaráðnum, sum umsitur veiðigjaldslógina, verður sagt í frágreiðingini.

Búskaparlig burðardygd fevnir m.a. um at tryggja vinnuni so góðar karmar sum til ber, soleiðis at virðisøkingin verður so stór sum gjørligt, skrivar landsstýrismaðurin í fiskivinnumálum.

Virðisøking

Júst virðisøking er eitt øki, sum størri fokus verður sett á, við tí fyri eyga at skunda undir eina størri virðisøking av tilfeinginum. Vinnan skal eggjast til at nýskapa, virðisøkja og meirvirka tilfeingið, soleiðis at útflutningsvirðið á tilfeinginum kann økjast munandi næstu árini, stendur í frágreiðingini. 

Gongd er sett á ætlan við arbeiðinum við virðisøking, og seinni í vár verður ráðstevna, har evnini nýskapan, virðisøking og meirvirking verða sett á breddan.