DeSantis gevst í forsetavalstríðnum

Republikanski guvernørurin Ron DeSantis gevst við royndini at gerast forsetavalevni hjá republikanska flokkinum. 

Tað boðar hann frá á sosiala miðlinum X.

Boðini koma beint fyri uppstillingarvalið í statinum New Hampshire, sum verður í morgin.

Meiningakanningar vísa, at DeSantis hevði mist atkvøður til bæði Donald Trump, fyrrverandi forseta, og Nikki Haley, fyrrverandi ST-sendiharra.

De Santis sigur nú, at hann styðjar Trump.

Trump fær helvtina av atkvøðunum

Kanning, sum sjónvarpsstøðin CNN hevur gjørt, vísir, at Donald Trump fer at fáa 50 prosent av atkvøðunum í New Hampshire, Haley 39 prosent, og DeSantis fær sambært kanningini bara seks prosent av atkvøðunum.

45 ára gamli DeSantis kunngjørdi í mai í fjør, at hann fór at royna at gerast republikanskt forsetavalevni.

Í 2022 var hann valdur aftur sum guvernørur í Florida og hevur verið væl umtóktur.

Men í uppstillingarvalunum til forsetavalið hevur gingið illa. Bæði Trump og Haley hava brúkt milliónir av dollarum at leypa á DeSantis í valstríðnum. 

Ron DeSantis hevur tvey ár eftir av seinna valskeiðnum sum guvernørur í Florida.