Skjóta bergholið ígjøgnum í mars

Bergholið undir Húsareyni í Havn verður skotið ígøgnum í næsta mánaði.

Bergholið, sum er millum Villingadalsvegin og Marknagil, verður 1.705 metrar langt og 10,5 metrar breitt.

Í løtuni eru okkurt um 450 metrar eftir at spreingja, og ætlanin er, at bergholið verður skotið ígjøgnum síðst í mars, sigur Tórshavnar kommuna.

324 milliónir

Articon ger bergholið og innkomuvegin, sum kosta 324 mió. kr. Landið rindar ein triðing og kommunan tveir triðingar.

Articon sigur, at Argjafláin hevur darvað arbeiðnum nakað. Argjafláin er royðulindin, sum gongur ígjøgnum fjallið.

Vanliga eru slíkar lindir millum hálvan og ein metur, men Argjafláin er seks metrar.

Meginparturin er leirur og sandsteinur, og tí má arbeiðast varliga, serliga har fláin gongur ígjøgnum loftið á tunlinum, skrivar Articon.