Flogbóltur: Finalistarnir skulu finnast

Leygardagin verður hálvfinaludagurin í steypakappingini í flogbólti í Klaksvík.

Longu undan dystunum hjá kvinnum er greitt, at finalistarnir ikki verða teir somu sum í fjør. SÍ og Fleyr hittast nevniliga í aðrari hálfinaluni. Í hinari hálvfinaluni spælir Mjølnir ímóti oddaliðnum í landskappingini, Drátti, sum bert hevur tapt ein dyst í ár.

Mjølnir stórfavorittur

Hjá monnum er Mjølnir stórfavorittur í hálvfinaluni ímóti Fleyr. Klaksvíkingar eru suverent oddalið í landskappingini, og fyri kortum vann Mjølnir tryggan 3-0 sigur á júst Fleyr. 

Hin hálvfinalan ímillum SÍ og ÍF sær munandi javnari út á pappírinum. Vukasin Nedeljkovic spælir aftur fyri ÍF, og liðini hava vunnið hvør sín innanhýsis dyst higartil hetta kappingarárið.

Hálvfinalurnar í Bónus-kappingini

Kl. 13:00 Dráttur – Mjølnir, kvinnur 
Kl. 15:00 SÍ – ÍF, menn
Kl. 17:00 SÍ – Fleyr, kvinnur 
Kl. 19:00 Mjølnir – Fleyr, menn