Bústaðir skulu hava nýggjan stjóra

Bustaðir skulu hava nýggjan stjóra

Stýrið fyri Bústaðir og Andras Róin, sum hevur verið stjóri síðani 2011, hava í semju gjørt fráfaringaravtalu í sambandi við, at stýrið vil fara undir eina menningartilgongd, og at ein nýggjur stjóri skal mynda hesa tilgongd.

Tað sigur Teitur Samuelsen, formaður í stýrinum fyri Bústaðir, í tíðindaskrivi.

Fyribils stjóri verður Hjørdis Gaard Lailudóttir, til nýggjur stjóri er settur í starv. Hjørdis er 54 ára gomul og útbúgvin cand. scient. pol., og hon hevur drúgvar royndir bæði innan tað almenna og privata.

Bústaðir er farið frá at vera ein grunnur, sum hevði sum aðalmál at veita fígging til húsabygging, til at verða eitt bústaðafelag, sum stendur fyri at byggja og leiga út bústaðir kring landið.

Lýst verður eftir nýggjum stjóra til Bústaðir í næstum.