Skiparin á Kambi: Fingu ikki boyulúkuna aftur

Kambur hevði verið inni og krokað í nakrar dagar, tá ið skiparin gjørdi av at fara út aftur 5. februar, altso dagin fyri vanlagnudagin. 

Tað greiddi skiparin á Kambi frá í sjófórhoyrinum í Føroya rætti í dag. 

Tað vóru millum 15 og 20 metrar um sekundið, tá ið Kambur fór út aftur, men skiparin vísti á, at tað er púra vanligt hjá teimum at seta og draga í slíkum veðri.  

Rak upp í ættina

Teir seta um eitt-tíðina um náttina, men tá ið teir skulu fara at draga um sjeytíðina týsmorgunin 6. februar, var øgiliga ófantaligt veður. Tað rak upp í ættina, og tað var sum í einari grýtu, ið kókar, so sjaskut var tað, greiddi skiparin frá. 

Skiparin var sjálvur á brúnni, tá ið teir løgdu klárt at taka boyuna inn gjøgnum boyulúkuna í bakborð.

Kambur hevur dragibrunn, og tí verður sjálv línan drigin inn gjøgnum eitt hol í botninum. Men boyan verður tikin inn gjøgnum boyulúkuna í bakborð.  

Kambur, boyulúka

Fekk tveir sjógvar

Tríggir mans stóðu í lúkuni og gjørdu klárt at taka boyuna, tá ið Kambur fyrst fekk ein sjógv.

Skiparin greiddi frá, at sjógvurin var ikki so stórur, men hann gjørdi, at Kambur lyftist upp í stýriborð. Tað hevði við sær, at fitt at sjógvi kom inn gjøgnum boyulúkuna. Men tað lagaði seg aftur.

Stutt eftir fekk Kambur ein sjógv afturat, og tá royna teir tríggir, sum stóðu í lúkuni, at fáa boyulúkuna aftur, men teir fingu hana ikki aftur.

Talan er um eina hydrauliska skipan, og óvist er, hví lúkan ikki vildi fara aftur. Antin riggaði hon ikki, ella hevði okkurt kílað seg fast, helt skiparin. 

Hoyr Marjuna Dalsgaard greiða frá úr rættinum: