Sigurd L. Lamhauge: Misálit frá landsstýrismanninum

- At  landsstýrismaðurin, Dennis Holm, velur at brúka ráð frá privatum um Suðuroyartunnilin, kann eg ikki sum stjóri á einum stovni, sum hevur sum fremstu uppgávu ráðgeva politisku skipanina, góðtaka, og tað hevur framskundað uppsøgnina. 

Tað sigur Sigurd L. Lamhauge, sum hevur sagt seg úr starvi sum stjóri á Landsverki.

Hann fatar tað sum eitt misálit frá Dennisi Holm, at landsstýrismaðurin ikki tekur ráðini frá stjóranum á Landsverki til eftirtektar.

Sigurd L. Lamahuge sigur, at landsstýrismaðurin lurtar meira eftir privatum aktørum enn eftir Landsverki, tá ið talan er um, hvussu nógv Suðuroyartunnilin fer at kosta.

Hoyr samrøðu, sum Hallur av Rana gjørdi við Sigurd L. Lamhauge í útvarpstíðindunum: 
 

Dagført:

Sigurd L. Lamhauge fer beinleiðis í annað stjórastarv, tí hann er júst settur sum stjóri í IRF í Leirvík. 

Tað skrivar heimasíðan hjá interkommunala renovatiónsfelagsskapinum. 

Umframt at hava verið stjóri á Landsverki í góð fýra ár, hevur Sigurd L. Lamhauge starvast í nógvum ymiskum verkætlanum sum ráðgevandi verkfrøðingur í Føroyum og uttanlands.

Hann er útbúgvin elektro-mekanikari, verkfrøðingur og Master í leiðslu, skrivar IRF.fo.