Álitið um kringvarpsgjaldið kemur væntandi í morgin

Væntandi kemur álitið um kringvarpsgjaldið í morgin.

Tað sigur formaðurin í mentanarnevndini hjá løgtinginum, Sólvit E. Nolsø.

Hann sigur, at hann miðar eftir at fáa samda nevnd, men tað verður torført, ásannar hann.

Onkrar broytingar

Onkrar broytingar vera gjørdar í uppskotinum hjá landsstýrinum. Sólvit E. Nolsø vil ikki siga, hvørjar tær eru. 

Men tað er ikki vanligt at broyta eitt lógaruppskot negativa vegin, sigur hann.

Verður álitið lagt fram í morgin, verða onnur viðgerð og atkvøðugreiðsla í fyrsta lagi 11. apríl, tá fyrsti tingfundur verður eftir tann, sum er í morgin.

Sólvit Nolsø

Sólvit E. Nolsø er formaður í mentanarnevndini. (Savnsmynd: Bjarni Árting Rubeksen)

13 krónur aftrat um mánaðin

Sirið Stenberg, landsstýriskvinna í mentamálum, hevur skotið upp at hækka kringvarpsgjaldið 13 krónur, upp í 165 krónur um mánaðin. 

Gjaldið hjá pensjónistum, sum hevur verið 50 krónur, hækkar sambært uppskotinum upp í 63 krónur um mánaðin. 

Uppskotið mælir eisini til bíligari kringvarpsgjald hjá smáum virkjum og stovnum.

Skotið verður eisini upp at prístalsjavna kringvarpsgjaldið. Higartil hevur eingin prístalajavning verið.