Hákun og Óli í European League-fjórðingsfinalurnar

Bæði Hákun West av Teigum og Óli Mittún skulu spæla fjórðingsfinalu í European League-kappingin hjá EHF.

Føroyski vongurin og felag hansara, Füchse Berlin, vunnu tryggan 34-28 sigur á Kadetten í aðru áttandapartsfinaluni týskvøldið, og tað gav berlinrevunum ein tíggjumálssigur samanlagt.

Hákun West av Teigum, sum skeyt fimm mál í landskappingardysti um vikuskiftið, spældi ikki stóran leiklut hesa ferð.

Óli og Sävehof vendu øllum á høvdið

Meðan Füchse Berlin hevði leiðsluna undan seinna dystinum í kvøld, stóð verri til hjá Óla Mittún og hinum í IK Sävehof.

Sviar taptu nevniliga fyrra dystin fyri TSV Hannover Burgdorf við fýra málum, men heima á Partille Arena vendu teir gulu og svørtu øllum og endaðu við at vinna við heili níggju málum 34-25.

Føroyska stórtalentið skeyt tvey mál og legði upp til ikki færri enn níggju.

oli_mittun_169.jpeg

Renna seg í Jóhan

í fjórðingsfinaluni bíðar ein uppaftur størri uppgáva fyri IK Sävehof og Óla Mittún. Teir renna seg nevniliga í triðja føroyingin í kappingini, Jóhan á Plógv Hansen, og krútsterka Flensburg-Handewitt, sum við fyrsta plássinum í bólkaspælinum leyp áttandapartsfinalurnar um.

Füchse Berlin og Hakun West av Teigum bresta saman við franska felagnum, Nantes, sum í løtuni liggur á 2. plássi í bestu fronsku deildini aftanfyri PSG.