Hálvt ár við kríggi í Gasa

Í dag er hálvt ár síðan Hamas framdi yvirgangsatsókn móti Ísrael. 

Tað var tann 7. oktober í 2023, at Hamas-limir úr Gasa-geiranum framdu yvirgangin, sum kravdi 1.139 mannalív, umframt at 253 fólk vórðu tikin sum gíslar.

Ísrael svaraði aftur við hermegi, og greiði boðskapurin var, at nú skuldi Hamas berjast niður einaferð með alla.

Seinasta hálva árið hevur krígsstøða valdað í Gasa-geiranum, og meir enn 33.000 fólk hava latið lív í stríðnum, umframt at fleiri túsund onnur eru horvin undir húsaleivdum og allarhelst eru deyð.

Sambært felagsskapinum Save The Children eru nærum 14.000 av teimum 33.000 deyðu í stríðnum børn.

ST sigur, at Gasa nú er á markinum til hungursneyð, sum fer at raka øll, sum búgva í økinum. Tað eru 2,3 milliónir fólk.

Av teimum 253 fólkunum, sum vórðu burturflutt í yvirgangsatsóknini 7. oktober, eru 130 ikki komin afturíaftur. Hildið verður, at umleið 95 av teimum framvegis eru á lívi.