Hava framvegis ikki lýst eftir nýggjum stjóra til Bústaðir

Nú tveir mánaðir eru farnir, síðani Andras Róin, stjóri á Bústøðum, varð sendur til hús, er framvegis ikki lýst eftir nýggjum stjóra. 

Avgerðin at senda stjóran til hús var tikin á stýrisfundi 9. februar.

Grundgevingin hjá stýrinum fyri at koyra stjóran frá var, at stýrið skuldi fara undir menningartilgongd, sum ein nýggjur stjóri skal standa fyri. 

Nýggj strategi

Sambært svari til innlitsumbøn hjá Kringvarpinum vóru eingi skjøl ella samskifti annars um nakra nýggja strategi fyri Bústaðir.

Teitur Samuelsen, stýrisformaður fyri Bústaðir, sigur við Dag og viku, at avgerð er ikki tikin um, nær lýst verður eftir nýggjum stjóra fyri Bústaðir. 

Tað hevði annars skund at skifta stjóra á Bústøðum. Á sama stýrisfundi, 9. februar, samtykti stýrið fyri Bústaðir at seta Hjørdis Gaard Leiludóttir sum fyribils stjóra fyri Bústaðir.