Serfrøðingar: 45.000 bygningar í Khan Younis lagdir í oyði

Býurin Khan Younis í Gasa er ikki at kenna aftur hjá teimum palestinum, sum eru komnir heimaftur, eftir at ísraelski herurin er farin úr býnum.

Stór øki liggja í sori eftir mánaðir við hørðum bardøgum og bumbuálopum. 

Okkurt um 55 prosent av býnum eru løgd í oyði, síðani kríggið brast á 7. oktober í fjør, er niðurstøðan hjá serfrøðingunum Corey Scher og Jamon Van Den Hoek.

Niðurstøðan hjá serfrøðingunum, sum eru knýttir at amerikonskum universitetum, byggir á myndir frá fylgisveinum, skrivar AP-tíðindastovan.

45.000 bygningar lagdir í oyði

Okkurt um 45.000 bygningar eru lagdir í oyði ella hava fingið skaða.

Ísrael sigur, at Khan Younis var háborg hjá Hamas. Hernaðarligu tiltøkini í býnum hava dripið túsundtals krígsmenn og oyðilagt stóran part av tunnilsskipanini hjá Hamas, sum verður brúkt til at flyta vápn og krígsmenn.

Ísrael sigur eisini, at prógv eru fyri, at gíslar hava verið hildnir fangar í býnum. 

Innrás í Rafah

Ætlanin hjá Ísrael um at gera innrás í býin Rafah, sum Ísrael sigur er seinasta háborgin hjá Hamas, hevur elvt til altjóða stúran fyri teimum umleið 1,4 mió. palestinunum, sum hava leitað sær skjól í býnum.

Tættasti sameindi hjá Ísrael, USA, hevur sagt, at tað hevði verið eitt mistak at gera innrás í Rafah og hevur kravt eina eftirfarandi ætlan fyri at verja sivila fólkið.