Pedagogfelagið aftur til samráðingarborðið í dag

Klokkan 13 fer Pedagogfelagið aftur til samráðingar við Lønardeildina hjá Fíggjarmálaráðnum og Kommunala arbeiðsgevarafelagið.

Tríggir fundir eru lagdir til rættis. tann fyrsti var í seinastu viku, og annar fundurin er í dag.

Sanna á Løgmansbø, forkvinna í Pedagogfelagnum, vil einki siga um, hvat er á samráðingarborðinum:

- Men eg kann siga so mikið, at vit eru jalig, og tað tykist hin parturin eisini at vera.

Fór úr gildi fyri einum ári síðani

Báðir partar vísa vilja at fáa samráðingarnar at ganga skjótt og smidliga, sigur Sanna á Løgmansbø.

- Í næstu viku vænti eg, vit fara at síggja, hvønn veg tað ber, sigur forkvinnan.

Triði samráðingarfundurin verður mikudagin í næstu viku. Sáttmálin var galdandi til 1. apríl í fjør.

Trý onnur feløg á almenna arbeiðsmarknaðinumhava ikki fingið nýggjan sáttmála enn.

Tey eru Maskinmeistarafelagið, Skipara- og navigatørfelagið og Havnar arbeiðskvinnufelag.