Sinnisbati: Stórar avbjóðingar á sálarheilsuøkinum

Stórar avbjóðingar eru á sálarheilsu- og psykiatriska økinum, og tað er av alstórum týdningi, at økið verður raðfest hægri politiskt.

Tað sigur felagið Sinnisbati, sum hevði aðalfund 19. mars.

Nevndin skipaði seg við Súsonnu Olsen sum forkvinnu og Odu Jóhansdóttir sum næstforkvinnu.

Nevndin sigur, at felagið fer at varpa størri ljós á fleiri viðurskifti, ið hon heldur vera týdningarmikil fyri at uppraðfesta økið. 

Leikur um sálarsjúku

- Vit fara at varpa ljós á, hvat vit kunnu gera, meðan vit bíða eftir, at politiska skipanin handlar, sigur nevndin.

Tað næsta á skránni er frumsýning av nýggja leikinum, Løstir. Hetta er leikur um sálarsjúku og at finna fótafestið, ið Sinnisbati er partur av.

Við leikinum vónar nevndin at vera við til at skapa eina samrøðu um tabuevni og varpa ljós á, hvussu týdningarmikið tað er, at vit duga betur at tosa opið um tað at stríðast sálarliga.

Leikurin verður frumsýndur í Norðurlandahúsinum 24. mai.