Málið er fólkaatkvøða fyri summarfrítíðina

-Málið er at halda vegleiðandi fólkaatkvøðu um samanlegging fyri summarfrítíðina.

Tað sigur Janus Thomsen, borgarstjóri í Hvalbiar Kommunu, eftir at bygdaráðið í Hvalba og býráðið á Tvøroyri høvdu felags fund í gjár.

Í felags fráboðan eftir fundin í gjár siga báðir borgarstjórarnir - Kristin Michelsen og Janus Thomsen - at talan var um ein jaligan fund, har niðurstøðan var, at arbeitt verður víðari við eini møguligari samanlegging.

Í løtuni fara fram samráðingar millum Tvøroyri og Hvalba um, hvussu kommunurnar kunnu leggja saman. Talan er um praktisk viðurskifti, sum greiða skal fáast á og semja um, áðrenn spurningurin verður lagdur út til fólkaatkvøðu. 

-Avgerandi er, at fólk í Hvalba og í Sandvík vita neyvt, hvat tey taka støðu til á eini komandi fólkaatkvøðu, sigur Janus Thomsen. 

Sambært Hagstovuni búgva 635 fólk í Hvalbiar Kommunu og 1741 fólk búgva í Tvøroyrar Kommunu. 

Fyrr í mánaðinum segði meirilutin av bygdaráðnum í Fámjin NEI til at skipa fyri fólkaatkvøðu í kommununi um samanlegging. Í Fámjins Kommunu búgva sambært Hagstovuni 77 fólk.

Hoyr samrøðu við Janus Thomsen: