- Tíðindi, mentan og ítróttur
Blinken í Ukraina
![](https://kvf.fo/sites/default/files/styles/grein-ovasta-mynd/public/blinken_og_zelenskyj.jpg?itok=qLgwzsh-)
Amerikanski uttanríkisráðharrin Antony Blinken er komin til høvuðsstaðin í Ukraina, Kyiv, har hann m.a. fer at hitta forsetan í landinum, Volodymyr Zelenskyj.
Einki hevur verið sagt um ferðina hjá Blinken, áðrenn hann tíðliga í morgun kom við toki til Kyiv.
- Leikluturin hjá uttanríkisráðharranum er at tosa um, hvussu vit kunnu hjálpa Ukraina at styrkja verjuna og gera landið ført fyri at fáa størri fyrimunir á hermótinum, segði eitt amerikanskt embætisfólk við journalistar, sum eru við á ferðini.
Ósemja í kongressini
Ósemja var í kongressini í USA í fleiri mánaðir um hernaðarligan stuðulspakka til Ukraina.
Men 24. apríl kundi amerikanski forsetin Joe Biden skriva undir hjálparpakkan.
Skotvápn, langtberandi rakettir og loftverjuskipanir verða nú send ukrainsku deildunum, sigur embætisfólkið.
- Blinken skal á vitjanini vissa ukrainskar leiðarar, m.a. Zelenskyj, forseta, um, at USA framhaldandi fer at stuðla Ukraina, sigur embætisfólkið, sambært NTB.