Hjálparfólkini eru ikki reingerðarfólk

Eldranevndin samtykti eftir tilmæli frá umsitingini í Tórshavnar kommunu fyri einum tveimum mánaðum síðani, at hjálparfólkini skuldu gera reint, umframt at røkja sítt vanliga røktararbeiði.

- Hesum vildu vit ikki lata okkum lynda, tí tað er tað sama sum at “bumba okkara yrki 15 ár aftur í tíðina”, sigur Mary Antonsdóttir, forkvinna í Heilsuhjálparafelag Føroya.

Hon heldur lítið um, at tankin yvirhøvur verður hugsaður, at tað aftur skal vera, sum tá heimahjálpirnar í síni tíð millum annað átóku sær at vaska heima hjá fólki.

Brúka tíðina øðrvísi
- Í dag fevnir arbeiði um røkt og ikki reingerð, sigur Mary Antonsdóttir, ið tó ikki væntar, at Tórshavnar býráð, nú málið kemur fyri á fundi hósdagin, fer at halda fast við upprunaliga tilmæli um, at hjálparfólkini eisini skulu taka sær av reingerðini.

Nú normeringin hjá heilsuhjálparunum er farin frá sjey tímum upp í átta, hevur tað verið brúkt sum grundgeving fyri, at hjálparfólkini kundu brúkt tann sjeynda tíman til reingerðarbeiði.

Tað heldur Mary Antonsdóttir ikki vera nakað gott hugskot, tí skuldi nøkur avlopstíð verið, so er nógv frægari, at hon verður brúkt til at gera okkurt saman við brúkarunum, heldur enn at fara í gongd við tvøgu og spann.

Hoyr samrøðu við Mary Antonsdóttir: