Avlop á gjaldsjavnanum síðani 2012

Føroyar hava havt avlop á gjaldsjavnanum hvørt ár síðani 2012.

Miðalavlopið frá 2018 til 2022 er 1,5 milliardir krónur, skrivar Landsbankin.

Gjaldsjavnin vísir allar gjaldingar millum Føroyar og útlond. 

Talan er um gjaldingar fyri vørur, tænastur, løn hjá føroyingum, sum arbeiða uttanlands, og løn hjá útlendingum, sum arbeiða í Føroyum. 

Haraftrat eru gjaldingar fyri avkast av føroyskum íløgum í útlondum og útlendskum íløgum í Føroyum. Og rakstrarflytingar, sum ikki eru lønir ella avkast av ognum, men til dømis ríkisveitingin úr Danmark, eru eisini við.

1,3 milliardir í avlopi í 2022

Gjaldsjavnin var tvær milliardir og 209 milliónir krónur í 2019.

Hann var eina milliard og 275 milliónir í 2022.

Seinastu árini hava Føroyar havt avlop av vøruhandlinum, men hall hevur verið á tænastuhandlinum. 

Yvirskot er í inntøkuflytingum, tí so nógvir føroyingar arbeiða uttanlands. Yvirskot er eisini í rakstrarflytingum. Tað ger ríkisveitingin úr Danmark.

Tvær orsøkir eru til, at Føroyar hava havt varandi avlop á gjaldsjavnanum seinastu árini, skrivar Landsbankin.

Onnur er, at eftirlønaruppsparingin er vaksin nógv.

Hin er, at fleiri stórar føroyskar fyritøkur hava havt stór yvirskot seinnu árini.