Verkfallið heldur fram

Terje Sigurðsson, semingsmaður, váttar beint nú, at samráðingarnar millum arbeiðarafeløgini og arbeiðsgevararnar enn einaferð eru slitnaðar.

- Báðir partar stóðu ultimativt fast við síni mørk, og tí var ikki grundarlag fyri at koma við einum semingsuppskoti. Í verandi løtu fær Semingsstovnurin als onki gjørt, sigur Terje Sigurðsson.

Semingsmaðurin vil ikki seta tal á, hvat skilir partarnar. Men hann staðfestir, at teir eru ikki til at vika.

- Sum støðan er nú, so er tað heilt vónleyst at samráðast og als onki grundarlag fyri at arbeiða víðari, sigur Terje Sigurðsson.

Hetta merkir, at verkfallið, sum mánadagin hevur vart í fýra vikur, heldur fram. Og i løtuni er Semingsstovnurin ikki partur av loysnini.