Benny Gantz farin úr ísraelsku stjórnini

Benny Gantz, sum er fyrrverandi verjuovasti í Ísrael, tekur seg úr krígsstjórnarráðnum hjá Benjamin Netanyahu.

Tað skrivar Haaretz.

- Tað er ein torgreidd og torfør avgerð, segði Gantz.

Hann heitir samstundis á Benjamin Netanyahu, forsætisráðharra, um at skriva út val tann dagin, sum semja er um.

Gantz sigur, at Netanyahu stendur í vegin fyri, at Ísrael røkkur málunum, sum tað hevur við krígnum í Gasa, skrivar NTB.

Avi Rosenfeld

Avi Rosenfeld hevur eisini lagt frá sær. (Mynd: Ísraelska verjan)

Stjórin fyri herin eisini lagt frá sær

Stjórin fyri ísraelska herin í Gasa, Avi Rosenfeld, gevst í starvinum.

Tað skrivar Times of Israel.

Orsøkin er skrædlið í ísraelsku verjuni, tá ið Hamas leyp á Ísrael 7. oktober í fjør.

-  7. oktober miseydnaðist tað mær í míni lívs størstu uppgávu at verja økið við markið, skrivar Rosenfeld í brævi til verjuleiðsluna.

Øll mugu taka sín part

- Øll, sum vóru uppi í hesum, mugu taka sín part av ábyrgdini, sigur hann og leggur aftrat, at hann fer at veita kanningarnevndini, sum kannar hendingina 7. oktober, alla ta hjálp, sum henni tørvar.

Rosenfeld er annar í ovastu leiðsluni í ísraelska herinum, sum leggur frá sær eftir álopið 7. oktober. 

Undan honum hevur leiðarin fyri hernaðarligu fregnartænastuna lagt frá sær.