Stjørnuskot tryggjaðu vertstjóðini stórsigur

Florian Wirtz og Jamal Musiala vóru millum málskjúttarnar, tá Týskland vann 5-1 á Skotlandi og fekk eina dreymabyrjan upp á EM-endaspælið á heimavølli.

Týskland avgjørdi dystin við trimum málum í fyrra hálvleiki, og tá Skotland mátti spæla við 10 monnum allan seinna hálvleiki, legði heimaliðið tvey mál afturat, meðan Skotland fekk eitt at troysta seg við. 

Tað tók týskarunum bert 10 minuttir at leggja seg framum. Tað var Leverkusen-stjørnuskotið Florian Wirtz sum skoraði við góðum skoti av brotsteigarmarkinum. Níggju minuttir seinni var tað hin stóra unga stjørnan, Jamal Musiala, sum økti úr stuttari frástøðu eftir frálíkt týskt spæl.

20240614-214221-l-3000x2000ma.jpg

Var støðan hjá Skotlandi vánalig, versnaði hon uppaftur meir beint fyri steðgin. Ryan Porteous feldi İlkay Gündoğan í brotsteiginum, og VAR syrgdi fyri, at hann fekk reyða kortið, og heimaliðið fekk brotsspark. Tað setti Kai Havertz í netið.

Eftir steðgin sat Týskland á øllum, og innskifti Niclas Füllkrug økti til 4-0 við einum kanónskoti. Skotland fekk minkað um munin, tá Antonio Rüdiger setti bóltin í egið mál, men Emre Can fekk síðsta orðið í yvirtíðini. 

Vertstjóðin fekk tískil frálíka byrjan á heimavølli, og boðini vóru greið. Týskland er ikki við til stuttleikar.