Russar halda Ennibergi aftur

Trolarin Enniberg er afturhildin av russiskum myndugleikum.

Tað skrivar Vágaportalurin. 

Enniberg fiskar í russiska partinum av Barentshavinum, og sambært Vágaportalinum verður skipið hildið aftur, tí russar halda, at Enniberg hevur fiskað meira, enn skipið hevur loyvi til.

Misskiljing

Mortan Johannesen, reiðari, váttar fyri Vágaportalinum, at Enniberg hevur verið afturhildin í nakrar dagar, men helst er talan um eina misskiljing, sigur hann.

- Har er observatørur frá russarum umborð, og eisini hann heldur, at talan er um ein feil. Okkurt er talt dupult, og tað er eisini støðan hjá Vørn, sum eisini er inni í myndini, sigur Mortan Johannesen við Vágaportalin. 

Sambært reiðaranum hevur Enniberg nakað av kvotu eftir í russiskum sjógvi.