Kanna møguleikan at fáa maritima økið í miðnámsútbúgvingar

Ætlanin er kanna, hvussu vit kunnu fáa maritima økið at vera við í miðnámsútbúgvingunum.

Talan kann vera um tað, sum vit kenna úr Danmark sum 'HF i søfart'.

Tað sigur Djóni Nolsøe Joensen, landsstýrismaður, sum hevur svarað spurningum frá Eiriki í Jákupsstovu, løgtingsmanni, um maritimar útbúgvingar.

Hann sigur, at ein arbeiðsbólkur við fólki úr vinnuni, fakfeløgunum og útbúgvingarskipanini endurskoðar aspirant-skipanirnar.  

Ein annar arbeiðsbólkur endurskoðar og broytir útbúgvingina til skipsatstøðara. Hann skal gera styttri útbúgvingarleist fyri tey, sum vilja vera dekkarar. 

Arbeiðsbólkarnir leggja í hesum døgum síðstu hond á tilmælini hjá sær, sigur landsstýrismaðurin.

Djóni Nolsøe Joensen, PISA-kanningin 2022, 16:9

Djóni Nolsøe Joensen, landsstýrismaður. (Mynd: Bjarni Árting Rubeksen)

Nógv vilja vera maskinmeistarar

Eirikur í Jákupsstovu sigur, at sum skilst fara nógv færri nú í maritimu skúlarnar í Føroyum. 

Djóni Nolsøe Joensen svarar, at maskinmeistaraútbúgvingin hevur søguliga stóra tilgongd í løtuni. 

Flokkarnir hava verið fullteknaðir tvær tær seinastu ferðirnar. 

Eirikur í Jákupsstovu

Eirikur í Jákupsstovu, løgtingsmaður. (Mynd: Bjarni Árting Rubeksen)

Færri navigatørar

Tilgongdin til navigatørútbúgvingarnar er ikki eins góð.

Tilgongdin til útbúgving sum skipsatstøðingur hevur verið lítil okkurt árið. Men tað tykist sum skipsatstøðaraútbúgvingin er um at fáa viðurkenning.

Tað sæst í umsøkjaratalinum, sum er á veg uppeftir, sigur landsstýrismaðurin.