Útlendingar skulu vísa, at teir vilja vera integreraðir

Lógaruppskotið er um útlendingar, sum hava uppihaldsloyvi í Føroyum.

Lógin kravur m.a., at ávísir tilflytarar skulu til integratiónssamrøðu, har millum annað verður kunnað um, at integratiónssamrøða, málkunnleiki og innlit í føroyska samfelagið og mentanina eru sum byrjanarstøði treytir fyri at fáa varandi uppihaldsloyvi í Føroyum.

Umsøkjari til varandi uppihaldsloyvi skal hava víst í verki, at hann vil vera integreraður í samfelagið, stendur eisini.

Hoyr samrøðu við Bjarna Kárason Petersen, landsstýrismann í lógarmálum:

Samskipari í øllum økjum

Sambært uppskotinum skal landið býtast í integratiónsøki, og integratiónssamskipari skal setast í øllum økjum.

Tey, sum lógin umfatar, fáa ókeypis undirvísing í føroyskum og ókeypis skeið í føroyskari mentan og samfelagsviðurskiftum.

Hoyringarfreistin er til 1. august, og lógaruppskotið skal koma í gildi 1. januar næsta ár.

Seinastu árini er talið av tilflytarum økt sera nógv, sigur Løgmálaráðið.

Teir vóru 1,5 prosent í 2010. Í fjør vóru teir 5,5 prosent av fólkatalinum.