Hvast orðaskifti í fyrstu hólmgonguni

Amerikanski forsetin Joe Biden sigur seg vera nøgdan við hólmgonguna við fyrrverandi forsetan Donald Trump í nátt. 

- Eg haldi, at tað gekk væl, segði Biden, tá ið hann hitti fjølmiðlar eftir kjakið, skrivar CNN.

Spurdur, hvat hann heldur um ringu umrøðuna, sum hann fekk eftir kjakið, svarar Biden, at tað er torført at kjakast við ein, sum lýgur. New York Times hevur staðfest, at hann leyg 26 ferðir, stórur lygnari, segði Biden. 

Amerikanska tíðindarásin CNN hevur kannað fleiri útsagnir hjá Joe Biden og Donaldi Trump undir kjakinum í nátt. 

Og har vera fleiri útsagnir hjá Trump vístar aftur sum ósannar ella falskar.

Joe Biden

Joe Biden, forseti. (Mynd: AFP/Ritzau Scanpix)

Hækka skattin

M.a. segði hann, at demokratarni vilja 'drepa børn í áttanda og níggjunda mánaði í viðgongutíðini, ella 'til og við eftir føðing'.

Tað skrivar CNN er ósatt.

Trump segði eisini, at Biden fer at hækka skattin, so at hann verður fýra ferðir størri, enn hann er í dag. Tað sama segði hann undir hólmgonguni millum teir báðar upp undir forsetavalið í 2020.

Fakta-kannarar hjá CNN vísa hesum aftur.

Inflatiónin drepur

Fyrrverandi forsetin Donald Trump fanst hvassliga at sitandi forsetanum Joe Biden undir fyrsta parti av kjakinum, sum var um búskap. 

- Hann hevur ikki gjørt eitt gott arbeiði. Hann hevur gjørt eitt vánaligt arbeiði. Inflatiónin drepur landið landið hjá okkum. Hon drepur okkum øll, segði Trump.

Biden royndi at svara aftur við at vísa á mistøk hjá Trump.

- Vit mugu hyggja at støðuni, sum var, tá ið eg tók við sum forseti. Búskapurin hjá okkum var í fríum falli, svaraði Biden.

Donald Trump

Donald Trump, fyrrverandi forseti. (Mynd: Reuters/Ritzau Scanpix)

Aldur

Joe Biden skifti skjótt evni, tá ið orðstýrarin spurdi um aldur og trygd fyri starvinum sum forseti.

Biden kom fyrst við viðmerkinum um, at Trump ikki er nógv yngri.

- Hesin maðurin er trý ár yngri, og hevur nógv færri førleikar, segði Biden.

Síðani skifti hann skjótt evni og tosaði um búskaparpolitikkin í heiminum. 

Men eina løtu datt hann um orðini,  og tað flutti ikki uppmerksemið burtur frá, hvussu gamal hann er.

Hinvegin reypaði Trump um sínar framúrskarandi kognitivu kanningnar, og at hann herfyri vann eina golfkapping. 

Hann bjóðaði eisini Biden av í eini kognitivari kanning.

Her eru brot úr tí partinum av kjakinum:

Eigur at taka seg aftur

Ein limur floksleiðsluni hjá demokratunum sigur, at hon heldur, at Joe Biden eigur at taka seg aftur sum forsetavalevni.

- Tíðin nú hevði verið tann rætta, tá vit hugsa um heilsustøðuna, sigur Natida B. Ahmad, sambært New York Times.

Og stúrarin breiðir seg víðari í flokkinum.

- Hann hevði eitt mál, sum hann skuldi røkka, og tað var at vissa USA um, at hann er førur fyri at røkja starvið í sínum aldri, og tað eydnaðist honum ikki, sigur fyrrverandi demokratiski senatorurin Clair McCaskill, sambært The Washington Post.