Løgmaður gloppar aftur dyrnar til samstarv við fólkaflokkin

Løgmaður vil hava allar flokkar við, eisini teir í andstøðuni, nú politikkurin fyri framtíðina skal gerast.  

Tíðin er farin frá blokkpolitikki.

Summi mál eru ov stór til flokspolitiska togtogan, segði hann í frágreiðing sínari í tinginum í dag. 

"Vit bjóða tí øllum flokkum til borðið," segði hann. 

Vit eru til reiðar at førka okkum, segði løgmaður, sum var semjusøkjandi í frágreiðing sínari.

Allir flokkar bodnir á fund

Løgmaður nevndi langtíðarhaldførið, bústaðarmarknaðin, uttanríkispolitiska virkisførið, útlendingaøkið, og hvussu vit knýta Suðuroynna upp í hinar oyggjarnar.

Tað týdningarmesta eru breiðar semjur um langtíðarhaldførið og vælferðina hjá børnunum.

At tryggja langtíðarhaldførið krevur langtíðarloysnir. Langtíðarloysnir krevja langtíðarsemjur. 

Saman við landsstýriskvinnuni í fíggjarmálum havi eg kallað allar flokkar á fund eftir ólavsøku, segði Aksel V. Johannesen.