Ráðførsla í uttanlandsnevndini um heimshandil

Seinnapartin í dag hava uttanlandsnevndin, løgmaður og landsstýrismaðurin í uttanríkis- og vinnumálum ráðførslu um WTO.

Leingi hevur landsstýrið arbeitt fyri, at Føroyar fáa sjálvstøðugan limaskap í heimshandilsfelagsskapinum, World Trade Organization. 

Drúgt samskifti hevur verið við donsku stjórnina um málið.

Men enn hevur ikki eydnast at fáa semju, sum kann slóða fyri føroyskum limaskapi í WTO. 

Sjálvstøðugur føroyskur limaskapur í WTO fer framhaldandi at vera raðfestur frammarlaga í landsstýrinum, stendur í ískoytinum til frágreiðingina hjá løgmanni á ólavsøku.

Tilfarið, sum verður viðgjørt á fundinum í uttanlandsnevndini í dag, er ikki alment. Tað er í trúnaði.

Tað var longu í apríl, at løgmaður segði, at hann fór í uttanlandsnevndina við WTO.