Fýra lógaruppskot frá Fólkaflokkinum

Fólkaflokkurin eigur øll fýra lógaruppskotini, sum vóru løgd fyri løgtingið í dag.

Flokkurin mælir til at lækka tinglýsingargjaldið, sum í dag er eitt prosent av keypsprísinum, hvørja ferð ein fastogn verður handlað.

Gjaldið eigur bara at vera hálvt prosent av keypsprísinum, heldur Fólkaflokkurin, sum skjýtur upp at lækka gjaldið stigvíst, niður í 0,75% næsta ár og 0,5% í 2026.

Á fíggjarlógini fyri 2024 verður roknað við 52 milliónum krónum í inntøku frá tinglýsingargjaldi, sum also er 1% av keypsprísinum á fastogn.

Leingja gildistíð

Fólkaflokkurin vil eisini leingja gildistíðina á veiðiloyvunum, sum sambært sjófeingislógini fara úr gildi 1. januar 2034. Flokkurin mælir til at fara aftur til skipanina við 12 ára loyvum, og skjýtur tí upp at verandi veiðiloyvi skulu vera í gildi til 1. januar 2037.

Triðja lógaruppskotið hjá Fólkaflokkinum snýr seg um at javna skattastigan á hvørjum ári, soleiðis at hann fylgir lønar- og prísvøkstrinum í samfelagnum. Flokkurin vísir á, at lands-skattastigin er ikki javnaður síðani 2016. Síðani tá eru lønirnar í samfelagnum hækkaðar nógv, og avleiðingin av tí er, at skattatrýstið er økt nógv. 

Broyta ferðslulógina

Fjórða lógaruppskotið hjá Fólkaflokkinum snýr seg um at broyta ferðslulógina, soleiðis at revsingin fyri at koyra ávirkað av hassji verður tann sama sum revsingin fyri rúsdrekkakoyring.

Revsingin skal tí hækka alt eftir, hvussu stór nøgdin av hassji er í blóðinum, eins og gjørt verður við promillu-stiganum í rúsdrekkakoyring. Í galdandi lóggávu er linari revsing fyri at koyra ávirka av hassji enn av rúsdrekka.