Landsliðið til fyrstu Nations League-dystirnar úttikið

A-landsliðið hevur tvær spennandi avbjóðingar á skránni, nú menninir fara undir sína fjórðu UEFA Nations League-kapping.

Leygardagin 7. september klokkan 14:00 spæla Føroyar og Norðurmakedónia á Tórsvølli, og týsdagin 10. september spæla Lettland og Føroyar á Skonto stadion í Riga.

Fjórða landið í bólkinum er Armenia.

Í hesum sambandi bjóðaði FSF fjølmiðlum og øðrum áhugaðum til tíðindafund í Trinstovuni á Tórsvølli í dag, har Håkan Ericson, landsliðsvenjari, kunngjørdi hópin. 

Trý tóm pláss

Størsta yvirraskilsið var nokk, at trý pláss standa tóm í hópinum.

Orsøkin er, at tveir toppdystir verða spældir í annaðkvøld, týskvøldið, tá NSÍ og HB spæla við Løkin í Runavík, og B36 og Víkingur spæla í Sarpugerði í Norðagøtu.

Håkan Ericson, landsliðsvenjari, segði við Televarpið, at hann gjarna vil síggja, hvussu teir dystirnar spæla av, áðrenn hann setir nøvn á síðstu leikararnar. 

Håkan Ericson segði tó, at eitt pláss er ætlað málverjanum Mathias Lamhauge, ið kanska verður klárur eftir drúgvan skaða. 

Eitt navn, ið eisini manglar í hópinum, er Hallur Hansson, ið aftur spælir fast á miðvøllinum hjá KÍ. 

Håkan Ericson staðfestir, at hann var ovfarin av, at Hallur aftur spældi fótbólt á so høgum støði oman á ein sera álvarsaman skaða. Landsliðsvenjarin segði eisini, at hann hevur prátað við Hall, og teir vóru blivnir samdir um, at hann er ikki við hesa ferð. 

Málverjar:
Teitur M. Gestsson, HB
Bárður á Reynatrøð, Víkingur

Verjan:
Jóannes K. Danielsen, KÍ
Jann J. Benjaminsen, B36
Viljormur Davidsen, HB
Daniel Johansen, Hillerød
Andrias Edmundsson, Wisla Plock (Pólland)
Hørður Askham, FC Roskilde (Danmark)
Samuel J. Chukwudi, HB
Gunnar Vatnhamar, Víkingur Reykjavík (Ísland)
Arnbjørn Svensson, Víkingur

Miðvallarar:
Brandur Hendriksson, Frederikstad (Norra)
René Shaki Joensen, KÍ
Hanus Sørensen, HB
Adrian Justinussen, Hillerød (Danmark)
Meinhard E. Olsen, Mjøndalen IF (Norra)
Sølvi Vatnhamar, Víkingur
Mads B. Mikkelsen, KÍ

Álop:
Jóan Símun Edmundsson, FC Shkupi (Norðurmakedónia)
Klæmint A. Olsen, NSÍ