Livar bjargaður: Hevur tað eftir umstøðunum gott

Kona Livar Nysted, Svanna Sigmarsdóttir, boðar í kvøld frá á Facebook, at Livar hevur ringt heim, og at hann hevur tað eftir umstøðunum gott

Livar Nysted er millum tey fimm bjargaðu. Myndin er frá hansara síðstu støðudagføring umborð á Naddoddi

Mynd: Livar Nysted

Uni L. Hansen

27.08.2024 - 23:29

Tá opni, føroyski seksæringurin Naddoddur legði frá landi í Tvøroyri leygardagin við kós móti Noregi, so var føroyski havrógvarin Livar Nysted úr Hvannasundi ein av manningini, ið taldi seks.

Í kvøld kom Naddoddur og manningin umborð í havsneyð, og endin var, at Naddoddur holvdist út fyri norsku Vesturstrondini, vestan fyri oynna Stad.

Nadoddur kort

Kelda: Bergens Tidende

Fimm av manningini vóru bjargað, meðan tann sætti endaði undir Naddoddi og druknaði.

Nú er greitt, at Livar Nysted er millum tey bjargaðu.

Kona Sivar, Svanna Sigmarsdottir, boðar í kvøld frá á Facebook, at Livar hevur ringt heim, og at hann hevur tað eftir umstøðunum gott .

Manningini taldi, umframt Livar Nysted, fýra fólk úr Sveis, Andy Fitze, skipari, Georg Aebi, Martin Fitze og Säny Blaser, fotografur, og so Karla Dana, víkingafornfrøðingur, úr Meksiko, men búsitandi í Orlando í Florida, USA.

Enn hava norsku myndugleikarnir ikki upplýst navnið ella tjóðskapin hjá tí, ið lat lív í vanlukkuni.

Naddoddur

Manningin umboð á Naddoddi undan fráferðini (Mynd: Sonne Smith)

Í kjalavørrinum á víkingunum

Talan skuldi vera um eina ævintýrferð hjá teimum seks fólkunum, har tey sigldu við Naddoddi í kjalavørrinum á víkingunum aftur til Noregs.

The Viking Voyage kallaðu tey ferðina, og stigtakararnir høvdu fingið gjørt eina flotta netbók, ið segði søguna um ferðina:

The Viking Voyage - exploring the 9th-century with Naddoddur.

Høvuðsmaðurin aftan fyri ferðina, Andy Fitze úr Sveis, greiddi í einum video á Youtube frá um ferðina, og hví søgan um víkingarnir hugtók hann og hini umborð so nógv.

Um Naddodd

Bátafelagið Naddoddur bleiv stovnað 19. november 1995 á Tvøroyri. Endamálið var, at byggja seksæring og neyst og soleiðis varðveita part av gomlu føroysku mentanini.

Ì 1996 fekk felagið Pakkhúsið á Tanganum til ognar frá p/f N.J. Mortensen, og ætlanin um at byggja neyst bleiv slept.

31. mars 1997 bleiv báturin Naddoddur flotaður. Johan Olsen, bátabyggjari á Tvøroyri, bygdi seksæringin.

Hvør var Naddoddur ? Jú hann var mætur víkingur, ættaður av Øgdum (Agder) í Noregi, men búsitandi í Føroyum. Einaferð hann var handilsørindi í Noregi, kom óveður á hann, og hann rak av leið og rakti við land á Eystfirði. Kavaæl kom, og hann rópti landið fyri Snæland, seinni Ísland. Tí verður Naddoddur mettur sum fyrsti maður í søguni, sum rakti við Ísland.