Spæla ímóti Ukraina í Litava

Útidysturin hjá bestu føroysku hondbóltsmonnunum ímóti Ukraina í EM-undankappingini, sum byrjar í november, skal spælast í Litava.

Síðan kríggj brast á í Ukraina, hava ukrainar spælt sínar heimadystir aðrastaðni, og soleiðis er framvegis. Nú er greitt, at heimadysturin hjá ukrainum ímóti Føroyum skal spælast í Avia Solutions Group Arena í Vilnius. Sama dag spæla Litava og Norðurmakedónia í somu høll.

Hetta er annar dysturin í undankappingini til endaspælið í Danmark, Norra og Svøríki í januar í 2026. Fyrst spæla føroysku menninir á heimavølli ímóti Kosovo. Tann dysturin er 6. november.