MEGD: Grundleggjandi rættindi vanta framvegis

Fleiri grundleggjandi rættindi hjá fólki, sum bera brek, eru framvegis ikki nóg góð í Føroyum, og fleiri tilmæli eru ikki fingin í rættlag, nú 10 ár eftir ST-hoyringina í 2014.

MEGD skrivar á heimasíðu sínari, at nú 10 ár eru liðin, síðani hoyringina í brekrættindanevndini hjá Sameindu tjóðum í 2014, hevur nevndin aftur sent landsstýrinum niðurstøður við støði í eygleiðingum av føroyskari lóggávu og sent tilmæli, har orð verða sett á álvarsom viðurskifti viðvíkjandi rættindum hjá fólki, ið bera brek.

Brekrættindanevndin vísir í niðurstøðunum og tilmælunum á, at fleiri grundleggjandi rættindi framvegis ikki eru nøktandi hjá fólki, ið bera brek. 

Fleiri tilmæli eru eisini, sum ikki enn eru fingin í rættlag síðani 2014.

Tóra við Keldu

Tóra við Keldu er forkvinna í MEGD.

Sáttmálin limast inn í føroyska lóggávu

Millum annað mælir nevndin til, at Føroya landsstýri í góðum og miðvísum samstarvi við fólk, ið bera brek og limafeløg teirra, skipa soleiðis fyri, 

- at brekrættindasáttmálin verður innlimaður í føroyska lóggávu, og at stig verða tikin til tess at sáttmálin verður nýttur sum grundarlag í arbeiðinum hjá dómstólunum og í almennu umsitingini sum heild

- at verandi lóggáva verður eftirmett

- og at lógir, ið skapa afturstig fyri fólk, ið bera brek, verða rættaðar.

Sambært MEGD er ein long røð av tilmælum frá brekrættindanevndini hjá ST til landsstýrið.

Talan er um viðurskifti, sum Føroya landsstýri sum skjótast eigur at taka í álvara, sigur MEGD.

Les meira her.