Frágreiðing um Málráðið verður løgd fram í dag

Í dag leggur Sirið Stenberg, landsstýriskvinna, frágreiðing um Málráðið fyri løgtingið. 

Ein arbeiðsbólkur hevur eftirmett Málráðið.

Arbeiðsbólkurin skuldi svara, um lógin um málráð virkar eftir ætlan. 

Hann skuldi eisini kanna, um til ber at áseta reglur um Málráð, Staðarnavnanevnd og Navnanevnd í somu lóg.

Ein frágreiðing um eftirmeting var skrivað í 2016. Hon var tó ongantíð løgd fram og kom ikki í løgtingið. 

Samstarv við Staðarnavnanevndina og Navnanevndina

Arbeiðsbólkurin, sum var settur í mai í fjør, kundi taka við upplýsingar úr henni, har tað var mett viðkomandi.

Átta punkt vóru í arbeiðssetninginum hjá arbeiðsbólkinum.

Millum annað skuldi hann lýsa, hvussu samstarvið er við Staðarnavnanevndina og Navnanevndina.

Og fyrstu munnligu spurningarnir í hesi tingsetuni eru á tingfundinum í dag.

Tingfundurin í dag er kl. 11.00.